MÜŞFİQ BORÇALI – 55 İLLİK  ÖMÜR YOLUNU ELMİN ZİYASI İLƏ İŞIQLANDIRAN, DUYĞU VƏ DÜŞÜNCƏLƏRİNİN HƏSSAS ADAMI

TƏBRİK EDİRİK!..

Müşfiq Borçalı ziyalı ocağında dünyaya gəlib özü də ziyalı mövqeyinə sahib olan dəyərli bir insandır. Və bu gün bu ziyalı insanın 55 yaşı tamam olur. 55 yaşın tamamında ona dostları, həmkarları, doğmaları, yaxınları xoş arzu-diləklərini ünvanlayıb cansağlığı və bol-bol müvəffəqiyyətlər arzu edirlər.
Mən Müşfiq müəllimi tanıdığım gündən onda hər zaman dost səmimiyyəti, mütəvazi və həssas qayğıkeşlik, müşahidə və yerindəcə təhlil etmək qabiliyyəti gördüm. O, ətrafında olan insanlara sadəcə baxmır, o, onların daxili dünyasını görməyə çalışır, təhlil edir, dəyər verir. Məhz onun bu xüsusiyyəti mənim daxili aləmimdə gizlənib qalmış fərqli bir bacarığımın üzə çıxmasına səbəb oldu. Və beləliklə də başladı bizim Müşfiq Borçalı ilə dostluq və əməkdaşlıq münasibətlərimizin təməli. Mən onu bütün yaradıcı insanların dostu, həmkarı adlandırıram. Çünki o, hər zaman yaşından, mövqeyindən və imkanlarından asılı olmayaraq yaradıcı insanların yanında olmağı bacarır və onlara dəstəyini əsirgəmir.

Müşfiq Borçalı ziyalı bir ocağın – akademik Mədəd Namaz oğlu Çobanovun ocağının layiqli təmsilçisi və  davamçısıdır. Atanın övlada qoyduğu ən böyük miras təmiz ad və şərəfli ömür yoludur. Müşfiq müəllim atasının ona miras qoyduğu əmanəti daim şərəf və ləyaqətlə qoruyub saxlayır. “Unutsaq, unudularıq!” çağırışı altında atasının və bir çox digər ziyalı insanların yaradıcılığını və elmi düşüncələrini təbliğ edir, gənc nəslin vətənpərvərlik və milli ruhunun formalaşmasına xidmət edir.
Müşfiq Borçalı ziyalıdır, pedaqoqdur, naşirdir, sayt rəhbəridir, ailə başcısıdır, dəyərli dostdur,  vətəndaşdır, vətənpərvərdir. Onun bir çox digər mövqe və xüsusiyyətlərini də beləcə sadalamaq mümkündür. Lakin ən başlıcası isə o, əsl insandır. Əsl insan olmaq və əsl insan kimi də qala bilmək hər kəsin bacaracağı bir iş deyil.

Mən sizə hər zaman ürəyinizin və əməlinizin gözəlliklərini qoruyub saxlaya bilməyi arzu edirəm, Müşfiq müəllim.
Sizi “ZiM.Az” saytın və “Borçalı” nəşriyyatının bir əməkdaşı olaraq öz adımdan və “Nur ocağı” ədəbi məclisinin üzvləri adından doğum günü münasibətilə ürəkdən təbrik edirəm. “Yeni yaşınız yeni uğurların təməli olsun!” – deyirəm və fikrimi sizə ünvanlanmış bir şeirimlə tamamlamaq istəyirəm:

https://www.youtube.com/watch?v=mjQvYs9evrc

Müşfiq müəllim,

doğum günün mübarək!

Dostlar ünvanlayır xoş arzu, dilək,
Sevinclə döyünsün köksündə ürək.
Təbriklər söyləyək, danışaq gülək.
Səni hər bir zaman bəxtiyar görək,
Müşfiq müəllim, doğum günün mübarək!

Yorulmasın duyğun, bitməsin sözün
Sənə yoldaş olsun cəsarət, dözüm.
Ömür yollarında qoyduğun izin,
Qoy uğur gətirsin, biz əhsən deyək
Müşfiq müəllim, doğum günün mübarək!

Sevgiylə bəzənsin ömür sarayın,
Zəfərlər gətirsin hər günün, ayın,
Zirvələrdən gəlsin sovqatın, payın.
İnsan əməliylə ucalsın gərək,
Müşfiq müəllim, doğum günün mübarək!

RAMİLƏ ƏLİYEVA,

ZiM.Az-ın Baş redaktoru,
“Borçalı” nəşriyyatının şöbə müdiri,
“Nur ocağı” Ədəbi Məclisinin mətbuat katibi,
“Abdulla Şaiq”, “Qızıl qələm”, 
“Zirvə” və “Zəfər” mükafatları laureatı

ZiM.Az