“İnam” İdman Klubunun fəaliyyəti yüksək qiymətləndirilib

Görüşün əsas məqsədi gəncləri idmana həvəsləndirmək, sağlam həyat tərzini təbliğ etmək, eləcə də gənclər arasında idmanın inkişafına dəstək göstərmək olub.
Tədbiri giriş sözü ilə açan Qafqaz Hüquq və İnteqrasiya Mərkəzinin direktoru Rezo Həsənov iştirakçıları salamlayaraq “İnam” İdman Klubunun fəaliyyətini yüksək qiymətləndirib. O, klubun gənclərin sağlam həyat tərzinin formalaşdırılması, idmana marağının artırılması və onların regional, eləcə də Gürcüstan səviyyəsində keçirilən yarışlarda qazandıqları uğurların təqdirəlayiq olduğunu vurğulayıb.
Rezo Həsənov klub kollektivinə gələcək fəaliyyətində yeni nailiyyətlər və uğurlar arzulayıb.Daha sonra çıxış edən klubun rəhbəri Şahin Bəxtiyarov rəhbərlik etdiyi idman klubunun fəaliyyəti, məşq prosesi, iştirak etdikləri turnirlər və əldə etdikləri nəticələr barədə ətraflı məlumat verib.
Bildirilib ki, klubun yetirmələri dəfələrlə rayon və Gürcüstan çempionatlarının qalibi və mükafatçısı olublar, həmçinin komanda hesabında müxtəlif yarışlarda birinci yerlərə layiq görülüblər.

Çıxış edən qonaqlar idmançılara gələcək yarışlarda yeni uğurlar arzulayıb, onların zərərli vərdişlərdən uzaq, sağlam həyat tərzi sürmələrinin və cəmiyyət üçün faydalı gənclər kimi yetişmələrinin vacibliyini vurğulayıblar.

Görüş zamanı Qafqaz Hüquq və İnteqrasiya Mərkəzi ilə “İnam” İdman Klubu arasında gələcək əməkdaşlıq imkanları, birgə layihələrin həyata keçirilməsi, əlaqələrin daha da genişləndirilməsi və idmanın inkişafına yönəlmiş təşəbbüslər ətrafında fikir mübadiləsi aparılıb.

Tədbirin sonunda Qafqaz Hüquq və İnteqrasiya Mərkəzi adından 15 nəfər idmançı fəxri fərman və sertifikatlarla təltif olunub.

Həmçinin klub rəhbərliyinə göstərdikləri səmərəli fəaliyyətə görə təşəkkür ifadə olunub.

Sonda iştirakçılar xatirə şəkilləri çəkdiriblər.

AYGÜN AKINAY,
“YURD”un redaktoru

ZiA.Az

.